12/01/2007

KALANDRAKA RECUPERA O CLÁSICO “OS TRES BANDIDOS”

Cunha versión fiel á orixinal en alemán publicada nos anos 60, KALANDRAKA pon en valor esta obra coa que creceron moitas xeracións de nenos no noso país, seducidos pola historia destas peculiares personaxes, excelentemente caracterizadas cos seus orixinais aspectos e o seu atípico instrumental para cometer feitorías.

O relato destaca polo seu carácter descriptivo, pola orde narrativa co que transcurren as accións, pola sinxeleza coa que Tomi Ungerer guía ao lector páxina a páxina. Á comprensión da historia axudan en gran medida as ilustracións: o contraste cromático, a expresividade en cada escea e o aspecto enigmático que caracteriza aos bandidos son os elementos máis señeiros.

Este libro transmítenos emocións que van dende o medo á tenrura. Os bandidos deste conto non coñecen outro mundo que non sexa o de roubar e amedrentar á xente. A irrupción nas súas vidas dunha nena orfa farálles cambiar de rumbo, ao comprender que coas riquezas que acumularon poden axudar a outros enenos necesitados.

A II Guerra Mundial marcou a vida de Tomi Ungerer dende da súa infancia e o rexeitamento aos conflitos bélicos estivo presente en gran parte da súa obra. A súa produción editorial, que abarca 40 anos de creación artística, calcúlase entre 30.000 e 40.000 debuxos dos máis variados estilos e máis de 120 libros.

Polo seu traballo recibiu premios como a Medalla de Ouro da Sociedade de Ilustradores ou o Premio Hans Christian Andersen, en 1998. Retirado como ilustrador, volcouse na súa faceta de filántropo e causas humanitarias como a protección da infancia ou a atención ás persoas enfermas.

12/12/2006

MARC TAEGER COMPARTIU COS ‘PIRATAS’ DE ‘A PROCURA DO TESOURO’ A FIGURA DE “AQUILES, O PUNTIÑO”

Nas semanas previas, os ‘piratas’ capitaneados por Migallas viñan realizando varias actividades relacionadas con este libro, do que destaca a novidosa técnica empregada por Marc Taeger, a base de collage con papeis pintados.

Finalmente, os ‘piratas’ tiveron o seu propio obradoiro de plástica creativa, seguindo o sistema que o ilustrador viña de aplicar na elaboración do mural. O obxectivo, segundo María Campos, de Migallas, era que “a partir dos elementos dos que está formada a figura de Aquiles, cada neno cree a súa propia composición, xogando coas cores e coas formas, con total liberdade de movemento e de creación”.

Non é a primeira vez que Marc Taeger visita aos ‘piratas’; anteriormente ten compartido con eles unha xornada de encontro á que tamén asistiu o Premio Nacional de Literatura Infantil e Xuvenil, Antonio Rodríguez Almodóvar, autor do álbume “A verdadeira historia de Carapuchiña”, editado por KALANDRAKA e ilustrado polo propio Taeger. O seu traballo artístico neste libro foi galardoado co Premio Daniel Gil de Deseño Editorial 2005.

Marc Taeger, artista suízo afincado en Marín (Pontevedra), traballa como deseñador gráfico, pintor, escultor e creador multimedia. As súas obras téñense exposto en Luxemburgo, Alemania, China, España, Francia e outros países.

 

A BIBLIOTECA ROSALÍA DE CASTRO DE VILAGARCÍA CONVÉRTESE NUN PEQUENO MUSEO PARA A CAMPAÑA 'CANTAR E CONTAR'

Destaca a obra de Marc Taeger, un deseñador suizo afincado dende hai anos en Galicia, que ilustrou o clásico “A verdadeira historia de Carapuchiña”. Esta obra foi galardoada en 2005 co Premio Daniel Gil de Deseño Editorial ao mellor Álbum Infantil. Nesta mesma sala están as figuras de plastilina das pontevedresas Sofía F. Rodríguez e Ana Míguez para o libro “Os sete cabritos”.

Xunto cos artistas galegos, a exposición conta coa obra doutros ilustradores convidados. Así, o valenciano Pablo Auladell ilustrou “A casiña de chocolate”, un título que KALANDRAKA reeditou co gallo do décimo aniversario da editorial. Na exposición da Biblioteca Rosalía de Castro destaca unha reprodución -de gran formato e feita con cartón- da casa ilustrada por Auladell para este conto dos irmáns Grimm.

Ademais, figuran os orixinais de “Os tres osos”, realizados polo extremeño Miguel Tanco cunha técnica mixta a base de acrílicos, collage e materiais textís.

O vindeiro mércores día 26, a partir das 18:30 horas, a Biblioteca Pública Municipal acollerá unha sesión especial de contos e música a cargo do equipo de animación á lectura de KALANDRAKA, como peche da campaña “Cantar e contar”. Estará dirixida ao público en xeral e principalmente ao público familiar de toda a bisbarra arousana. Nesta sesión tamén se poderán apreciar as pezas cerámicas do ferrolterrán Francisco Pérez Porto para o libro-disco “Solaina”, do que se toma a imaxe da campaña. Acompañarán a estas figuras unha mostra de instrumentos musicais e varios obxectos de valor antropolóxico recuperados da cultura popular galega.

Mostrando resultados 116 a 118 de 118